माहूर:- अनेक प्रकारचे औषधी गुणधर्म असलेले जांभळं सध्या सर्वत्र विकायला आली आहेत. वर्षातून केवळ पावसाळ्यात मिळणाऱ्या जांभळांना माहूर च्या बाजारपेठेत मोठी मागणी वाढली आहे. जांभळं चवीसोबत गुणवर्धक असल्याने त्यांची सोमवार च्या आठवडी बाजारपेठेत मोठ्या प्रमाणात विक्री होत असल्याचे दिसून आले.
नैसर्गिक मेवा प्रत्येक ऋतूत हवाहवासा वाटतो. त्या त्या भागातील हवामानानुसार नैसर्गिक फळांची मागणी स्थानिक बाजारपेठेसह इतरही लांब पल्ल्याच्या बाजारपेठेत असते. गावरान जांभळं आरोग्यवर्धक असून सध्या माहूर शहरात स्थानिक स्तरावर याला मोठी मागणी आहे. सध्या जांभळांचा भाव १०० रुपये किलो आहे.जून महिन्यात जांभळं हमखासपणे मिळतात. ग्रामीण भागात २५ ते ३० रुपया मध्ये एक पाव या दरात विक्री केले जात आहे. आरोग्यवर्धक व मर्यादित दिवसांतच हे फळ मिळत असल्याने या काळात याची जास्त मागणी असते.
जांभूळ हे विशेषतः गोड तुरट चवीचे असतात. जांभूळ मधुमेह या रोगावर गुणकारी आहे. जांभूळ रसाच्या तसेच बिया भुकटीला औषधी गुणधर्म आहेत. जांभळाच्या बियांचे चूर्ण हे मधुमेहावर औषध आहे. जांभूळ रक्त शुद्ध करते. चेहऱ्यावरचे मुरूम व फुटकुळ्या जांभळाच्या बिया उगाळून लेप लावल्यास नष्ट होतात. जांभूळ हे पाचक आहे असेही मानले जाते. जांभळाचे आसव बनवता येते. वर्षभर टिकवून ठेवण्यासाठी जांभळाच्या पिकलेल्या फळापासून जेली, सिरप असे उपयुक्त पदार्थ तयार करता येतात. रामायण व पौराणिक ग्रंथांमध्ये जांभळाचे महत्त्व विशद केले आहे. एकूणच जांभूळ हे फळ आरोग्यासाठी अतिशय लाभदायी आहे.
