ग्रामपंचायत निवडणूक रणधुमाळी; तोफा थंडावल्या!

माहूर(सरफराज दोसानी):- गेल्या आठ दिवसांपासून धडाडणाऱ्या ग्रामपंचायत निवडणुकीच्या तोफा आज थंडावल्या. येत्या १८ सप्टेंबर रोजी आता मतदान होणार असल्याने जास्तीत जास्त मतदान मिळवण्यासाठी उमेदवारांनी सेटिंग्ज सुरू केली आहे. त्यात त्यांना कितपत यश मिळतं हे निवडणूक निकालानंतरच समजेल. रविवारी मतदान होणार असल्याने अधिकाधिक मतदान मिळवण्यासाठी आता उमेदवारांसाठी उद्या शनिवार ची रात्र “जागते रहो’ च्या भूमिकेत राहणार आहे.
माहूर तालुक्यात २४ ग्राम पंचायतीच्या निवडणुका जाहीर झाल्या होत्या,त्या पैकी वसराम नाईक तांडा येथील गावकऱ्यांनी निवडणुकीवर बहिष्कार घातला आहे.त्या मुळे २३ ग्राम पंचायत सार्वत्रिक निवडणुकी साठी १८ रोजी मतदान होणार आहे.तालुक्यातील सर्वाधिक लोकसंख्या असलेली वाई ग्रामपंचायत आहे.त्यामुळे वाई बाजार येथील निवडणूक तालुक्यातील महत्त्वाचे राजकीय वळण देणारी ग्रामपंचायत असल्याने सर्वाधिक चुरस या निवडणुकीत आहे.राष्ट्रवादी काँग्रेस पुरस्कृत खान – बेहरे पॅनल व शिवसेना पुरस्कृत गावकरी पॅनल,मध्ये मोठी रस्सीखेच आहे.दोन्ही गटांकडून निवडणूक जिंकण्यासाठी साम, दाम, दंड वापरत सर्व शक्ती पणाला लावली आहे,तर प्रहार प्रणित युवा परिवर्तन पॅनल चे उमेदवार प्रभाग क्रमांक ३ व ५ मध्ये कोणाचे गणित बिघडवितात यावर सध्या वाई बाजार गावात एकच चर्चा सुरू आहे.
प्रचाराच्या तोफा थंडावल्या….
ग्रामपंचायत रणधुमाळी आता अंतिम टप्प्यात आली असून १८ रोजी प्रत्यक्षात मतदान होणार आहे. निवडणूक आयोगाच्या सुचनेनुसार प्रचाराच्या जाहीर तोफा शुक्रवारी सायंकाळी पाच वाजता थंडावल्या आहेत. उमेदवारांनी विजयासाठी होम टू होम प्रचार केला असून त्या उमेदवारापेक्षा मीच कसा चांगला आहे. आणि गावचा विकास कसा करु शकतो हे पटवून सांगण्यासाठी उमेदरांची दमछाक होत आहे. तसेच सोशल मिडियाच्या माध्यमातून विरोधकांना टोमणे मारत यंदा सत्ता आपलीच असा जयघोष करत सरपंचपदावरही आपणच बसणार असल्याचे सोशल मिडियाच्या माध्यामातून जाहीरही करुन टाकले आहे.